2023 மே 11 வியாழன்

Posted on May 4, 2023May 4, 2023 by இலங்கை சத்தியவசனம்

📖 சத்தியவசனம் – இலங்கை

📙 இன்றைய தியானத்துக்குரிய வேதபகுதி வேத வாசிப்பு : 2கொரி 4:16-18

ஜெயவாழ்வு

புறம்பான மனுஷனானது அழிந்தும், உள்ளான மனுஷனானது நாளுக்கு நாள் புதிதாக்கப்படுகிறது. 2கொரிந்தியர் 4:16

“பிரச்சனைகள் வரும்போது நான் அதைப் பார்க்கமாட்டேன். மாறாக நான் தேவனை நோக்கிப் பார்ப்பேன். அவர் என் பிரச்சனைகளை மாற்றி, அதனோடு இடைப்படுவதை உணர்ந்திருக்கிறேன்”, இப்படியாக ஒரு சகோதரி தனது அனுபவத்தைப் பகிர்ந்து கொண்டார். வாழ்விலே போராட்டங்களையும், சோதனைகளையும் நாம் சந்திக்கும் போது முதலாவது நாம் சோர்ந்துவிடக்கூடாது. மாறாக, அவற்றையே முன்னேறும் படிக்கற்களாக மாற்றிக்கொண்டு, அதன் மேலே ஏறி வெற்றிநடை நடந்து ஜெயம்பெறலாமே! நாம் முதல்அடியை முன்னே எடுத்துவைத்தால் கர்த்தர் மீதியை நடத்துவார்.

“நாங்கள் சோர்ந்து போகிறதில்லை” என்கிறார் பவுல். அதற்கான காரணம், “காணப்படுகிறவைகளையல்ல, காணப்படாதவைகளையே நோக்கி இருக்கிற நமக்கு” என்கிறார். இவ்வுலகில் நாம் காணுகின்ற ஏராளமான விடயங்கள், இப்போது மேன்மையானதாக தெரிந்தாலும், அவைகள் ஒருநாள் மாறிப்போகும் அல்லது அழிந்துபோகும். நாம் அதை அறிந்திருந்தும் அவை நம்மை ஆக்கிரமித்துக்கொள்ள இடமளித்துவிடுகிறோம். இதுவே நமது வாழ்வில் தோல்விக்குக் காரணம். மறுபுறத்தில். கண் காணும் காரியங்களில் மயங்கி, கண்ணுக்குப் புலப்படாத, ஆனால் என்றும் மாறாத நித்தியமான காரியங்களை நாம் இலகுவாக மறந்துவிடுகிறோம். தேவன் நமக்குக் கிருபையாய் பெற்றுத் தந்த மீட்பு, அளவிடமுடியாத மன்னிப்பு, தேவனது பிள்ளை என்ற அதிகாரம், இவ்வுலகிலேயே தேவனோடு உறவாடும் பாக்கியம், நித்தியமாய் தேவனோடு வாழக்கூடியதான நித்திய ஜீவன், இப்படி ஏராளமான அழியாத நித்திய கிருபையை கர்த்தர் நமக்குத் தந்திருக்கிறார். இவைகள் எல்லாம் காணப்படுகிறவைகளாய் இல்லாவிட்டாலும்கூட, இவைகள் ஒருபோதும் நம்மைவிட்டு எடுபடாதவைகள். இவ்வுலக தோல்விகளின் நடுவிலும் இந்தப் பாக்கியம் நம்மை ஜெய பாதையில் இட்டுச்செல்லும்.

வாழ்வின் போராட்டங்கள் சோதனைகளில், நமது புறம்பான மனுஷன் ஒருவேளை தாக்கப்படலாம். ஆனால், உள்ளான மனுஷன் நாளுக்கு நாள் புதிதாக்கப்பட்டு ஜெய வாழ்வு வாழக்கூடியதாக, நாம் முகங்கொடுக்கின்ற போராட்டங்களை சவால்களாக மாற்றிவிடலாமே! தேவ ஆவியானவரின் கைகளில் நாம் இருப்போமானால், இந்த சவாலில் நாம் நிச்சயம் ஜெயம் பெறுவோம். பணம், பொருள், உடை என்றும், பதவி அதிகாரம் தகுதி தராதரம் என்றும் உலகம் இன்று பல கவர்ச்சிகளை நம் முன்னே விரித்துவைத்து, அவை நமக்கு அவசியம் போன்ற மாயையும் ஏற்படுத்தியுள்ளது. எத்தனை காலத்துக்கு இவைகளுக்குப் பின்னால் ஓடிக்கொண்டிருக்;கப் போகிறோம்? அழிந்துபோகும் அநித்தியமானவைகளுக்குப் பின்னால் நாமும் ஓடி அழிவைக் காணாமல், நாள்தோறும் உள்ளான மனுஷனில் பலம்கொண்டு, ஜெயவாழ்வு பெறுவோமாக!

💫 இன்றைய சிந்தனைக்கு:

முதலில். அநித்தியமானவற்றை இனங்கண்டு, நித்திய மானதுக்கு முதலிடம் கொடுத்து, வாழ்வை ஜெயமாக முடிக்க தேவ பெலத்துடன் முன்னோக்கி ஓடுவோமாக.

📘 அனுதினமும் தேவனுடன்.