2023 ஜுன் 4 ஞாயிறு

Posted on June 2, 2023June 2, 2023 by இலங்கை சத்தியவசனம்

📖 சத்தியவசனம் – இலங்கை

📙 இன்றைய தியானத்துக்குரிய வேதபகுதி வேத வாசிப்பு : ரோமர் 8:5-9

முதல் சத்துரு மாம்ச சிந்தை மரணம்.

மாம்ச சிந்தை தேவனுக்கு விரோதமான பகை. ரோமர் 8:6,7

“நமக்கு சத்துரு யார்” என்றால், உடனே “சாத்தான்” என்போம். ஆனால், “நானேதான் எனது முதல் சத்துரு” என்றால் மறுக்கமுடியுமா? உள்ளான வாழ்வின் குழப்பங்களுக்கும் முதற்காரணம் நாமே என்றால் மிகையாகாது. நமது கட்டுப்பாட்டை மீறிய பல விடயங்கள் நம் மனதை அரித்துக்கொண்டே இருக்கின்றன. நமது பழைய பாவமாக இருக்கலாம், இச்சையைத் தூண்டுகின்ற பாவ எண்ணங்களாக இருக்கலாம்; மாம்ச சிந்தை என்பது இதுவே, அதாவது, தனது கட்டுக்குள் நம்மை வைத்திருக்கும் நமது சுயம். ஆனால் ஆவியின் சிந்தை என்பது தேவனுடைய கட்டுப்பாட்டுக்கு, வார்த்தைக்கு அடங்குவது, அவரது அன்புக்குக் கட்டுப்படுவது. காலத்தின் கடைசியில் நிற்கும் நாம், தேவனைச் சந்திக்க ஆயத்தமா? நமது முதல் சத்துரு “நான்” அதாவது, எனது சுயம் நிறைந்த மாம்ச சிந்தையே என்பதை உணருகிறோமா?

பவுல் மக்களை இரண்டு ரகங்களாகப் பிரிக்கிறார்; ஒன்று, தங்கள் பாவ சுபாவத்தால் ஆளப்படுகிறவர்கள், மற்றது, பரிசுத்த ஆவியானவரின் ஆளுகையில் வாழுகிறவர்கள். நமது முந்திய வாழ்வை சற்று திரும்பிப் பார்ப்போமாக. “அக்கிரமங்களினாலும் பாவங்களினாலும் மரித்தவர்களாயிருந்த உங்களை” (எபே.2:1) என்று பவுல் நமது முந்தியநிலைமையை உணர்த்துகிறார். இயேசு சிலுவையில் நமக்கு வழி திறந்திருக்கா விட்டால், நாம் இன்றும் பவுல் குறிப்பிடுகிற முதலாவது ரகத்தைச் சேர்ந்தவர்களாகவே இருந்திருப்போம். நாம் ஆண்டவருக்கு ஒருதடவை “ஆம்” என்று சொன்ன பின்பு, பாவத்தைவிட்டு ஓடவேண்டும் என்ற வாஞ்சை நமக்குள் வந்தாலே போதும், அது மனந்திரும்புதலின் அடையாளமாக இருப்பதால், கிருபையாய் நாம் தேவனுடைய ஆளுகைக்குள் வருகிறோம். பின்னர், சோதனைகள் சவால்கள் தாக்கினாலும், திரும்பவும் மாம்ச இச்சைக்கு இடமளிக்கும்படி நமது ஆத்துமா பின்வாங்கிப்போகாது. அப்படிப் பின்வாங்கிப்போனால், அவர்களை மறுபடியும் புதுப்பிக்கிறது கூடாத காரியம் என்று வேதாகமம் சொல்லுகிறது (எபி.6:4-6).

தினமும் தேவ பிரசன்னத்தில் வாழுவதைத் தெரிவுசெய்வோமாக. தேவனது வழியை தெரிந்துகொண்டு அதிலே நடக்க நம்மை ஒப்புக்கொடுப்போம். ஒவ்வொரு சந்தர்ப்பத்தி லும் “ஆண்டவரின் சித்தம் என்ன” என்பதை சிந்திக்கத் தவறாதிருப்போம். சரியான பாதையை பரிசுத்த ஆவியானவர் சுட்டிக்காட்டும்போது கலகம்பண்ணாமல் அதையே பின்பற்றுவோமாக. அந்த பரிசுத்த வழி நடக்க ஆரம்பிக்கும்போதே நமது முதல் எதிரியாகிய மாம்ச சிந்தை நடுங்கும். நாளடைவில் அது செத்துப்போக நமது ஆவி உயிர்பெறும். ஆவியானவர் நமக்கு துணை நிற்பார். மாம்ச சிந்தையா, ஆவியின் சிந்தையா? உலகமா, சிலுவையா? நமது வாழ்வின் மையத்தை இன்றே தீர்மானிப்போமாக.

💫 இன்றைய சிந்தனைக்கு:

தேவனுக்கு விரோதமான மாம்ச சிந்தையும், தேவனுக்குப் பிரியமான ஆவியின் சிந்தையும் எனக்குள் போராடுமானால், இன்றே ஆவியானவரின் உதவியை நாடுவேனாக.

📘 அனுதினமும் தேவனுடன்.