ஜூலை 30 ஞாயிறு

Posted on July 25, 2023July 25, 2023 by இலங்கை சத்தியவசனம்

📖 சத்தியவசனம் – இலங்கை

📙 இன்றைய தியானத்துக்குரிய வேதபகுதி வேத வாசிப்பு : எபே 4:1-32

பழையதைக் களைந்து

அந்தப்படி, முந்தின நடக்கைக்குரிய மோசம்போக்கும் இச்சைகளாலே கெட்டுப்போகிற பழைய மனுஷனை, நீங்கள் களைந்துபோட்டு… எபேசியர் 4:22

வீடுகளிலே நாம் இருக்கும்போது, நமக்கு சௌகரியமான ஆடைகளை, அவை பழசாய்ப் போயிருந்தாலும் அவற்றையே அணிந்திருப்போம். திடீரென யாராவது வீட்டுக்கு வருகிறார்கள் என்றால் உடனடியாகவே எமது ஆடைகளை மாற்றி சிறந்த நல்ல ஆடைகளை அணிந்துகொள்கிறோம். இது சாதாரண விடயம். ஆனால், இப்படித்தான் நமது வாழ்வும். பழையதைக் களைந்துவிட்டால், அது மறைந்துவிடும்.

பாவ சுபாவங்களுடன் வாழ்ந்த நாம், கிருபையாய் மீட்பைப் பெற்றுக்கொண்டபோது, அந்தப் பழைய சுபாவங்களைக் களைந்து போட்டு, கிறிஸ்து இயேசுவைத் தரித்துக் கொண்டவர்களாய் வாழவே நாம் அழைக்கப்பட்டுள்ளோம். மோசம்போக்கும் இச்சைகளால் கெட்டுப்போன பழைய மனுஷனைக் களைந்துபோட்டு, நீதியிலும், பரிசுத்தத்திலும் தேவனுடைய சாயலாகச் சிருஷ்டிக்கப்பட்ட புதிய மனுஷனைத் தரித்துக்கொள்ளும்படிக்கு எபேசியருக்குப் பவுல் எழுதிய அறிவுரை இன்றும் நமக்கும் உரியதே.

கிறிஸ்துவுக்குள் அவயவங்களாய் இருக்கிற நாம் ஒருவருக்கொருவர் பொய் சொல்லலாமா? ஒரு அவயவம் பாடுபட்டாலே சரீரம் முழுவதுமே பாடுபடுமல்லவா! பின்னர்,எப்படி பொய் பேசுவது? கோபம் அனைவருக்கும் வரும். அநீதியைக் காணும்போதுகோபம் வரும், ஆத்திரத்திலும் கோபம் வரும். ஆனால் இந்தக் கோபம் பாவம் செய்யுமளவுக்கு நம்மை இழுத்துச் செல்லாதபடிக்கு ஜாக்கிரதையாக இருக்க வேண்டும் என்று பவுல் எச்சரிக்கிறார். கோபத்தை மனதிற்குள்ளே அதிக நேரம் அடக்கி வைத்தாலே, அது பிசாசுக்கு இடமளிப்பது போலாகிவிடும். எனவேதான் சூரியன் அஸ்தமிக்கும் முன்பாக உங்கள் கோபம் தணிந்து போகக்கடவது. அதாவது, அந்தந்த நாளிலே சமாதானமாகிவிடுவதே சிறந்தது. மேலும், பிறரிடமிருந்து அபகரிக்காமல், கொடுக்கிறவனாகவும் வேலை செய்கிறவனாகவும் இருக்கும்படிக்கும், கெட்டவார்த்தைக்கு இடங்கொடாமல், பரிசுத்தாவியானவர் துக்கப்படும்படியான காரியங்களை அகற்றி, ஒருவரையொருவர் மன்;னித்து, ஒருவருக்கொருவர் தயவாயும் மனஉருக்கமாயும் வாழவுமே நாம் அழைக்கப்பட்டுள்ளோம் (எபே.4:31,32).

எப்போதும் தீமையைத் தருகிற உங்கள் பழைய வாழ்க்கை முறைகளை விட்டு விடுங்கள். கசப்பும், கோபமும், மூர்க்கமும் அடையாதீர்கள். கோபத்தில் சத்தம் இடாதீர்கள். கடுஞ்சொற்களைச் சொல்லாதீர்கள். பாவங்களை செய்யாதீர்கள். ஒருவருக்கொருவர் தயவாயும், மனஉருக்கமாயும் இருங்கள். கிறிஸ்துவுக்குள் தேவன் உங்களை மன்னித்து விடுவதைப்போல நீங்களும் மற்றவர்களை மன்னித்து விடுங்கள். இதற்கு ஆவியானவர் நமக்கு உதவிசெய்வாராக.

💫 இன்றைய சிந்தனைக்கு:

பழையதுடன் புதியதை அணியமுடியாததுபோல, பழைய சுபாவத்தைக் களையாமல் புதிய சுபாவத்தைக் கொண்டு வரமுடியாது.

📘 அனுதினமும் தேவனுடன்.