ஜூலை 2 ஞாயிறு

Posted on June 29, 2023June 29, 2023 by இலங்கை சத்தியவசனம்

📖 சத்தியவசனம் – இலங்கை

📙 இன்றைய தியானத்துக்குரிய வேதபகுதி வேத வாசிப்பு : லூக்கா 10:1-11

சமாதானம்

சமாதான பாத்திரன் அங்கே இருந்தால், நீங்கள் கூறின சமாதானம் அவனிடத்தில் தங்கும், இல்லாதிருந்தால்… திரும்பி வரும். லூக்கா 10:6

இந்நாட்களில் அநேகர் விரக்தி நிலைக்குத் தள்ளப்பட்டவர்களாய், சமாதானமின்றி அங்கலாய்த்து அலைவதைக் காணக்கூடியதாய் உள்ளது. அகால மரணங்களும் அதிகரித்துவிட்டது. காரணம் மனிதன் சமாதானத்தை தேடவேண்டிய இடத்தில் தேடாமல் எங்கேயோ தேடி அலைகிறான். ஆனால் சமாதானம் என்பது பிரதானமாக நமது உள்ளத்தில் இருக்கவேண்டிய ஒன்று என்பதை நாம் புரிந்துகொள்வதில்லை.

இன்றைய வாசிப்புப் பகுதியானது, இயேசுவானவர் தமது சீஷர்களை இரண்டு, இரண்டு பேராக ஊழியத்துக்காக அனுப்புவதைக் காட்டுகிறது. அப்போது அவர்களுக்கு சில ஆலோசனைகளையும், வழிகாட்டுதலையும் சொல்லிக் கொடுத்தே ஆண்டவர் அனுப்பிவைக்கிறார். அதிலே ஒன்றுதான், “நீங்கள் ஒரு வீட்டிற்குள்ளே பிரவேசிக்கிற போது உங்களுக்குச் சமாதானம் என்று சொல்லுங்கள். அங்கே சமாதான பாத்திரன் இருந்தால், நீங்கள் கூறின சமாதானம் அவனிடத்தில் தங்கும். இல்லாதிருந்தால் அது உங்களிடத்திற்குத் திரும்பிவரும்” என்பதாகும்.

ஒருவர் சமாதானத்தை வழங்குவதால், நமக்குள் சமாதானம் வந்துவிடாது. எனக்குள் சமாதானம் வரவேண்டுமென்றால், ஏற்றுக்கொள்ளத்தக்க பாத்திரனாய் நான் இருக்கவேண்டும் என்பதையே இப்பகுதி வலியுறுத்துகிறது. சமாதானம் என்பது நமக்குள்ளேதேவ ஆவியால் உருவாக்கப்படுகின்ற ஒன்று. அதை நாம் வெளியில் பெற்றுக்கொள்ள முடியாது. உள்ளம் சமாதானமடையாவிட்டால், வெளியில் சமாதானத்துக்கான எத்தனை ஏற்பாடுகளைப் பண்ணினாலும், அல்லது சமாதான பேச்சு வார்த்தைகளை நடாத்தினாலும் அதில் பயன் எதுவும் கிடையாது. நமது உள்ளத்தில் சமாதானத்தைத் தரக்கூடியவர் நமது ஆண்டவர் இயேசு மட்டுமே. அந்த சமாதானத்தின் செய்தியையே போய்ச் சொல்லும்படிக்குச் சீடர்களை அனுப்பி வைக்கிறார். நீங்கள் போகும் இடத்தில் அவர்கள் உங்களை ஏற்றுக்கொண்டால், அங்கே புசித்துக் குடித்து, பிணியாளிகளைச் சொஸ்தமாக்கி, பரலோக ராஜ்யம் சமீபமாய் இருப்பதைச் சொல்லுங்கள். அவர்கள் ஏற்றுக்கொள்ளாவிட்டால், உங்கள் காலிலுள்ள தூசியையும் தட்டிப்போட்டு வாருங்கள் என்று கூறி அனுப்புகிறார். அதாவது அவர்கள் தங்கள் தருணத்தை இழந்து போனார்கள் என்பதை இது உணர்த்தும்.

சமாதானம் என்பது சண்டை பிரச்சனை இல்லாத ஒரு நிலை அல்ல; எந்த சூழ்நிலையிலும் கர்த்தருக்குள் அமைதியாய் திருப்தியாய் வாழுவோமானால் அதுதான் சமாதானம். இயேசுவானவர் அதை நமக்குத் தந்துள்ளார். (யோவா.14:27). சமாதானத்தை நாம் பிறரிடமும் பகிர்ந்துகொள்வோம். சமாதானத்தின் தேவனை பற்றிக்கொள்வோம். அப்போது எந்த சூழ்நிலையிலும் நாம் அசைக்கப்படமாட்டோம்.

💫 இன்றைய சிந்தனைக்கு:

எனக்குள் சமாதானம் உண்டா? அல்லது நான் அதைத் தேடி அலைகிறேனா?

📘 அனுதினமும் தேவனுடன்.