ஜூலை 12 புதன்

Posted on July 6, 2023July 6, 2023 by இலங்கை சத்தியவசனம்

📖 சத்தியவசனம் – இலங்கை

📙 இன்றைய தியானத்துக்குரிய வேதபகுதி வேத வாசிப்பு : கலா 1:1-5

பாவம் நிறைந்த உலகம்

அவர் நம்மை இப்பொழுதிருக்கிற பொல்லாத பிரபஞ்சத்தினின்று விடுவிக்கும் படி… நம்முடைய பாவங்களுக்காகத் தம்மைத்தாமே ஒப்புக்கொடுத்தார். கலாத்தியர் 1:4

பவுல், சட்டதிட்டங்களைக் கற்றறிந்த அறிஞர், கமாலியேலின் பாதத்திலிருந்து கல்வி கற்றவர். யூத மார்க்கத்தை முற்றிலுமாக அறிந்துகொண்டவர். அதைக் குறித்ததான பக்தி வைராக்கியத்தில் வாழ்ந்தவர். ஆனாலும் கலாத்தியருக்கு இந்த நிருபத்தை எழுதும்போது, தனது இரட்சிப்புக்கும், தான் இப்பொழுது அப்;போஸ்தலனாக இருப்பதற்கும் மனுஷரிடம் கற்றறிந்த அறிவு காரணமல்ல என்கிறார். அது முழுமையுமாக இயேசு கிறிஸ்துவினாலும், அவரை மரித்தோரிலிருந்து எழுப்பின பிதாவாகிய தேவனாலும் உண்டானது என்று ஆணித்தரமாகக் கூறி இந்த நிருபத்தை ஆரம்பிப்பதைப் பார்க்கிறோம்.

வாழ்த்து செய்தியுடன் ஆரம்பித்தவர், இன்னுமொரு முக்கியமான காரியத்தையும் குறிப்பிடுகிறார். இயேசு கிறிஸ்து, “நம்மை இப்பொழுது இருக்கிற இந்த பொல்லாத பிரபஞ்சத்தினின்று விடுவிக்கும்படி, நம்முடைய பிதாவாகிய தேவனுடைய சித்தத்தின் படியே நம்முடைய பாவங்களுக்காகத் தம்மைத்தாமே ஒப்புக்கொடுத்தார்.” நாம் இப் பிரபஞ்சத்தில் வாழ்ந்தாலும், நாம் இப் பிரபஞ்சத்துக்கு உரியவர்களல்ல. நாம் தேவனுக்குரியவர்கள். அவர் தமது இரத்தத்தையே விலைக்கிரயமாகக் கொடுத்து நம்மை தமக்காக மீட்டுக்கொண்டார். அதை நிறைவேற்றவே ஆண்டவர் தமது பரலோக மேன்மைகளைத் துறந்து, இவ்வுலகிற்கு வந்தார்.

ஆண்டவர் நம்மை மீட்டுவிட்டார் என்று விசுவாசிக்கிற நாம், இன்னமும் இந்தப் பிரபஞ்சத்திற்குரிய ஆசை இச்சைகளுடன், பாவத்துடன் போராடுவது ஏன்? ஆண்டவர்சிலுவையில் நமக்காக மரித்ததை வருடந்தோறும் நினைவுகூருவதும், பின்னர் அவர் உயிர்த்ததைக் கொண்டாடிவிட்டு அத்தோடு எல்லாம் முடிந்தது என்று இன்னமும் இந்தப் பிரபஞ்சத்திற்கு அடிமைகளாகக் கிடக்கிறோமா? இப்பிரபஞ்சத்தின் பிடியில்இருந்து நம்மை விடுவிக்கும்படி ஆண்டவர் நமது பாவங்களைச் சுமந்து தீர்த்துவிட்டார். நமக்காக அனைத்தையும் ஆண்டவர் செய்து முடித்துவிட்டார். அதை ஏற்றுக் கொண்டு வாழவேண்டும். பொல்லாத பிரபஞ்சத்தின் பாவங்களைவிட்டு விலகியோடவேண்டும். மாறாக, நாம் பின்வாங்கிப்போனால் அவரது கிருபையையும் தயவையும் நாம் இழந்தவர்களாகி விடுவோம்.

தேவன் நம்மைக் கோபாக்கினைக்கென்று நியமிக்காமல், நம்முடைய கர்த்தராகிய இயேசு கிறிஸ்து மூலமாய் இரட்சிப்படைவதற்கென்று நியமித்தார் (1தெச.5:9). இப்படியிருக்க நாம் அவருக்குச் சாட்சிகளாக வாழவேண்டாமா? பாவம் நிறைந்த உலகத்தில் அவருக்கான பரிசுத்த சாட்சிகளாக திகழவேண்டாமா?

💫 இன்றைய சிந்தனைக்கு:

கிறிஸ்து எனக்காக யாவையும் செய்து முடித்தார் என்பதை விசுவாசித்தாலும், இன்னமும் எனக்குள் பாவபோராட்டம் ஏன்?

📘 அனுதினமும் தேவனுடன்.