செப்டெம்பர் 5 செவ்வாய்

Posted on September 5, 2023September 5, 2023 by இலங்கை சத்தியவசனம்

📖 சத்தியவசனம் – இலங்கை

📙 இன்றைய தியானத்துக்குரிய வேதபகுதி வேத வாசிப்பு : யாத் 6:1-8

சர்வ வல்லமையுள்ளவர்!

நான் யேகோவா, சர்வ வல்லமையுள்ள தேவன்…. யாத்திராகமம் 6:2-3

“நாம் ஜெபத்தை முடித்து எழுந்தபோது, இடம்பெயர்ந்து போய்விடவேண்டும் என்ற உத்தரவு வந்தது. எங்கே போவது என்று தெரியாமல் நாம் பயந்து விழித்தோம். ஆனால், நானும் என் குடும்பத்தாரும் என்னைச் சேர்ந்த சிறுகூட்டத்தாரும் ஒரேமனமாக தீர்மானம்பண்ணி புறப்பட்டோம். முட்செடிகள் காடுகள், விழுந்து வெடிக்கும் ஷெல்குண்டுகள் எல்லாவற்றின் மத்தியிலும் புறப்பட்டு வந்தோம். தேவனுக்கு நன்றி சொல்ல நம்மிடம் வார்த்தையே இல்லை. நம் கண்முன்னே எத்தனையோ பேர் விழுந்து செத்துப்போன வேளையிலும், என்னோடு வந்த எவர்மீதும் ஒரு கீறல்காயம் கூட விழாதபடி கர்த்தர் காத்துக்கொண்டார். அவர் இனியும் நம்மை கைவிடவேமாட்டார். அவருக்கே துதி.” யுத்த சூழலில் அகப்பட்டு, தப்பிப் பிழைத்த ஒரு தேவபிள்ளை எழுதிய கடிதத்தின் சில வரிகள்தான் இவை.

ஏறத்தாழ கி.மு.605ல் நேபுகாத்நேச்சார் முதலாம் தடவையாக யூதரை சிறைபிடித்துசென்றபோது, அந்தக் கூட்டத்தில் சிறைப்பிடிக்கப்பட்ட தானியேலும் மனங்கலங்கித் தான் இருந்திருப்பார். அது இயல்பு. ஏற்றுக்கொள்ள முடியாத ஒரு கைது, ஒருநாளும் காணாத அந்நிய தேசம், பிறதெய்வ வணக்கமுள்ள ஜனங்கள், இவை யாவும் எந்தவொரு மனுஷனுடைய மனதையும் தாக்கும்; வெறுப்புண்டாக்கும். மேலும், யூத ராஜாக்களும் மக்களும் தேவனுக்கு விரோதமாக வாழ்ந்தபோதும், வாலிபனாகிய தானியேல் அப்படி வாழ்ந்திருக்க மாட்டார் என்பது அவருடைய வாழ்விலிருந்து நமக்கு விளங்குகிறது. ஆக, தன் விசுவாசத்தில் தளராத தானியேலும் சிறைபிடிக்கப்பட்டது நியாயமா? ஆனாலும், தானியேலோ தன் விசுவாசத்தில் தொடர்ந்தும் நிலைத்திருந்தார் என்பதுதான் உண்மை. எல்லாமே மாறுபாடாய் போனாலும் தமது பிள்ளைகள் விடயத்தில் தேவன் தமது திட்டத்தின்படியே கிரியை செய்கிறவர் என்பதில் தானியேல் உறுதியாயிருந்தார்.

இந்த நாளில் இரண்டு விடயங்களை மனதில் நிறுத்திக்கொள்வோமாக. ஒன்று, சமுதாயமாக அல்லது இனமாக ஒரு பிரச்சனை வரும்போது அதில் தேவபிள்ளைகளாகிய நாமும் தாக்கப்படுவதை தடுக்கமுடியாது. அடுத்தது, தீமை நம்மை மேற்கொண்டாலும் இன்னமும் கர்த்தரே சகல கட்டுப்பாட்டையும் தமக்குள்ளாக வைத்திருக்கிறார். இந்த உண்மையை வேதாகமம் முழுவதிலும் நாம் காணலாம். ஆகவே, தேவபிள்ளைகளாகிய நாம் எந்த சூழ்நிலைக்குள் அகப்பட்டாலும், கர்த்தர் கூடவருவார் என்ற உறுதி நமக்கு வேண்டும். அத்தோடு, அந்த சூழ்நிலையிலும் தேவன் நம்மீது வைத்திருக்கும் நோக்கம் என்ன என்பதிலும் நமக்கு அவதானம் வேண்டும். அந்த சித்தத்தில் நாம் இருப்போமானால், தீமையை நாம் மேற்கொள்வது உறுதி.

💫 இன்றைய சிந்தனைக்கு:

தேவன் என் தனிப்பட்ட வாழ்வில் வைத்திருக்கும் நோக்கம் என்ன என்பதில் நான் தெளிவாக இருக்கிறேனா?

📘 அனுதினமும் தேவனுடன்.